శాంసంగ్ గెలాక్సీ ఎస్26 అల్ట్రాపై భారీ డిస్కౌంట్.. రూ.19 వేల వరకు ఆదా!

ఎస్26 అల్ట్రా రెండు వేరియంట్లపై రూ.15 వేల ధర తగ్గింపు
256జీబీ మోడల్ కొత్త ధర రూ.1,24,999
512జీబీ వేరియంట్ ధర రూ.1,44,999
ఫ్లిప్‌కార్ట్‌లో కార్డు చెల్లింపులపై అదనపు క్యాష్‌బ్యాక్
ఆఫర్లతో కలిపి గరిష్ఠంగా రూ.19 వేల వరకు ప్రయోజనం

న్యూఢిల్లీ: ప్రీమియం స్మార్ట్‌ఫోన్ కొనుగోలు చేయాలని చూస్తున్న వారికి శాంసంగ్ గుడ్‌న్యూస్ చెప్పింది. కంపెనీ తన ఫ్లాగ్‌షిప్ ఫోన్ గెలాక్సీ ఎస్26 అల్ట్రా ధరలను తగ్గించింది. 12జీబీ ర్యామ్‌తో వచ్చే 256జీబీ, 512జీబీ స్టోరేజ్ వేరియంట్లపై రూ.15 వేల చొప్పున ధర తగ్గించింది.

ధర తగ్గింపు తర్వాత 12జీబీ+256జీబీ మోడల్ రూ.1,24,999కు అందుబాటులో ఉంది. 12జీబీ+512జీబీ వేరియంట్ ధర రూ.1,44,999గా ఉంది. ఇంతకుముందు వీటి ధరలు వరుసగా రూ.1,39,999, రూ.1,59,999గా ఉండేవి.

ఇదే సమయంలో ఫ్లిప్‌కార్ట్‌లో అదనపు క్యాష్‌బ్యాక్ ఆఫర్ కూడా అందుబాటులో ఉంది. ఫ్లిప్‌కార్ట్ యాక్సిస్, ఫ్లిప్‌కార్ట్ ఎస్‌బీఐ క్రెడిట్ కార్డులతో కొనుగోలు చేస్తే రూ.4 వేల వరకు ఇన్‌స్టంట్ క్యాష్‌బ్యాక్ పొందవచ్చు. దీంతో 256జీబీ వేరియంట్‌ను రూ.1,20,999కే కొనుగోలు చేసే అవకాశం ఉంది. మొత్తం మీద రూ.19 వేల వరకు ఆదా చేయవచ్చు.

గెలాక్సీ ఎస్26 అల్ట్రాలో 6.9 అంగుళాల డైనమిక్ అమోలెడ్ 2ఎక్స్ డిస్‌ప్లే, 120Hz రిఫ్రెష్ రేట్ ఉన్నాయి. స్నాప్‌డ్రాగన్ 8 ఎలైట్ జెన్ 5 ఫర్ గెలాక్సీ చిప్‌సెట్, ప్రైవసీ డిస్‌ప్లే ఫీచర్‌ను అందించారు. వెనుక భాగంలో 200 మెగాపిక్సెల్ ప్రధాన కెమెరాతో కూడిన క్వాడ్ కెమెరా సెటప్ ఉంది.