కాంటాక్ట్ లెన్స్‌లు ఉపయోగించేవారు వాటి శుభ్రత విషయంలో అప్రమత్తంగా ఉండాలి. లెన్స్‌లను కుళాయి నీరు, మినరల్ వాటర్ లేదా ఇతర నీటితో కడగడం ప్రమాదకరం. నీటిలో ఉండే కొన్ని సూక్ష్మజీవులు కళ్లలో తీవ్రమైన ఇన్ఫెక్షన్లకు కారణమై, ఒక్కోసారి చూపుపైనా ప్రభావం చూపవచ్చు.
అకాంతమీబాతో ఇన్ఫెక్షన్‌ ప్రమాదం
నీటిలో కనిపించే అకాంతమీబా అనే సూక్ష్మజీవి కాంటాక్ట్ లెన్స్‌ల ద్వారా కంటిలోకి చేరితే అరుదైనప్పటికీ తీవ్రమైన ఇన్ఫెక్షన్‌ అయిన అకాంతమీబా కెరటైటిస్‌ వచ్చే ప్రమాదం ఉంది. ఈ సమస్య వల్ల కంటిలో నొప్పి, ఎర్రబడటం, వెలుతురు చూడలేకపోవడం, చూపు మసకబారడం వంటి లక్షణాలు కనిపించవచ్చు. చికిత్స ఆలస్యమైతే చూపుకు శాశ్వత నష్టం కలిగే అవకాశం ఉంది.
ఇవి కూడా చదవండి
లెన్స్‌ల విషయంలో ఈ జాగ్రత్తలు తప్పనిసరి
కాంటాక్ట్ లెన్స్‌లను శుభ్రం చేయడానికి, భద్రపరచడానికి కంటి వైద్యులు సూచించిన ప్రత్యేక లెన్స్ సొల్యూషన్‌ను మాత్రమే ఉపయోగించాలి. లెన్స్‌లను ధరించే ముందు, తీసే ముందు చేతులను శుభ్రంగా కడిగి పూర్తిగా ఆరబెట్టుకోవాలి. ఈత కొట్టేటప్పుడు, స్నానం చేసేటప్పుడు లెన్స్‌లను తొలగించడం మంచిది. లెన్స్‌లను నీటితో తడపకూడదు.
లక్షణాలు కనిపిస్తే నిర్లక్ష్యం చేయొద్దు
కళ్లలో నొప్పి, ఎర్రదనం, అధికంగా నీరు కారడం లేదా చూపు మసకబారడం వంటి లక్షణాలు కనిపిస్తే వెంటనే కంటి వైద్యుడిని సంప్రదించాలి. సొంతంగా మందులు వాడకుండా వైద్యుల సూచనల మేరకు చికిత్స తీసుకోవాలి. చిన్నపాటి నిర్లక్ష్యం కూడా కంటి ఆరోగ్యంపై ప్రభావం చూపవచ్చని గుర్తుంచుకోవాలి.
