అమరావతి: మూడు దశాబ్దాల నిరీక్షణకు తెరపడనుందని, మార్కాపురం జిల్లా గంటవానిపల్లిలో సోమవారం కొత్త చరిత్ర ఆవిష్కృతం కానుందని సీఎం చంద్రబాబు తెలిపారు. వెలిగొండ ప్రాజెక్టు ఫేజ్‌-1ను ప్రారంభించి కృష్ణా జలాలను విడుదల చేయనున్నట్లు పేర్కొన్నారు.
1996లో ప్రారంభమైన ఈ ప్రాజెక్టు తొలి దశ పూర్తవడం తనకు ఎంతో సంతోషంగా ఉందని చంద్రబాబు అన్నారు. వెలిగొండ కేవలం నీటి ప్రాజెక్టు మాత్రమే కాదని.. కరవుతో పోరాడుతున్న రైతులకు భరోసా, ఫ్లోరైడ్‌ బాధితులకు ఆరోగ్య రక్షణ, వలస వెళ్లిన యువతకు సొంత ప్రాంతంలో ఉపాధి, వెనుకబడిన ప్రాంతానికి అభివృద్ధి మార్గం అని పేర్కొన్నారు.
వెలిగొండ ఫేజ్‌-1 ద్వారా 1.19 లక్షల ఎకరాలకు సాగునీరు, 4 లక్షల మందికి తాగునీరు అందుతుందని సీఎం తెలిపారు. ప్రాజెక్టు కోసం భూములు, ఇళ్లు, గ్రామాలను త్యాగం చేసిన 11 గ్రామాల నిర్వాసితులకు కృతజ్ఞతలు తెలిపారు.
ఇవి కూడా చదవండి
ప్రాజెక్టు ప్రారంభోత్సవం నేపథ్యంలో అధికారులు ఆదివారం ట్రయల్‌ రన్‌ నిర్వహించారు. కొల్లం వాగు వద్ద గేట్లు ఎత్తి నీటిని సొరంగంలోకి విడుదల చేసి నీటి ప్రవాహం, గేట్ల పనితీరు, సొరంగం ద్వారా నీటి తరలింపు ప్రక్రియను పరిశీలించారు.
