అమెరికాలో జరిగిన తమ ఏకైక కుమార్తె వివాహానికి వీసా సమస్యల కారణంగా తల్లిదండ్రులు హాజరు కాలేకపోయారు. దీంతో వీడియో కాల్ ద్వారా పెళ్లి వేడుకను వీక్షించి, నూతన వధూవరులను ఆశీర్వదించారు.
సూర్యాపేట జిల్లా హుజూర్‌నగర్ మండలం వేపలసింగారం గ్రామానికి చెందిన జయరాజు, జ్యోతి దంపతుల కుమార్తె హిమబిందు అమెరికాలో ఉద్యోగం చేస్తున్నారు. ఎన్టీఆర్ జిల్లాకు చెందిన రోహిత్‌తో ఆమెకు పరిచయం ఏర్పడి ప్రేమగా మారింది. ఇరు కుటుంబాల అంగీకారంతో అమెరికాలోనే వీరి వివాహం జరిగింది.
కూతురి పెళ్లిని దగ్గరుండి జరిపించాలని భావించిన తల్లిదండ్రులు అమెరికా వెళ్లేందుకు ప్రయత్నించినప్పటికీ, చివరి నిమిషంలో వీసా సమస్యలు ఎదురయ్యాయి. దీంతో ప్రయాణం నిలిచిపోయింది.
ఇవి కూడా చదవండి
అయితే టెక్నాలజీ సాయంతో వారు పెళ్లి వేడుకకు దూరంగా ఉన్నప్పటికీ దగ్గరయ్యారు. వీడియో కాల్ ద్వారా వివాహాన్ని ప్రత్యక్షంగా వీక్షించి, నూతన వధూవరులను మనసారా ఆశీర్వదించారు. అనంతరం బంధుమిత్రులు, గ్రామస్థుల కోసం స్వగ్రామంలో ఘనంగా విందు ఏర్పాటు చేసి తమ ఆనందాన్ని పంచుకున్నారు.
దూరం అడ్డొచ్చినా.. టెక్నాలజీతో కూతురి పెళ్లిలో తల్లిదండ్రుల ఆత్మీయ భాగస్వామ్యం స్థానికంగా అందరి దృష్టిని ఆకర్షించింది.
