నిర్మాణ పటిష్ఠత, ఇంటి స్థానం కలిసి కాపాడిన వైనం
రీఇన్‌ఫోర్స్‌డ్‌ కాంక్రీట్‌ ఫ్రేమ్‌తో ఇంటి నిర్మాణం
స్టీల్‌ రాడ్లతో స్తంభాలు, బీములు, పునాదుల అనుసంధానం
ప్రధాన వరద ప్రవాహానికి కాస్త పక్కన ఉన్న ఇల్లు
కొంత ఎత్తైన ప్రదేశంలో నిర్మించడంతో తప్పిన ముప్పు
ఇంటి ఆకారం కారణంగా నీరు రెండువైపులా ప్రవహించిన పరిస్థితి
నేపాల్‌: ఇటీవల నేపాల్‌లో సంభవించిన భారీ వరదలు తీవ్ర విధ్వంసాన్ని సృష్టించాయి. బండరాళ్లు, బురద, చెట్లు భారీగా కొట్టుకురావడంతో అనేక ఇళ్లు ధ్వంసమయ్యాయి. అయితే ఓ చిన్న పచ్చని ఇల్లు మాత్రం వరద ఉద్ధృతిని తట్టుకుని చెక్కుచెదరకుండా నిలిచింది. అందులో ఉన్న కుటుంబం కూడా సురక్షితంగా బయటపడింది. దీనికి సంబంధించిన వీడియో సోషల్‌ మీడియాలో వైరల్‌గా మారింది.
ఈ ఇల్లు ఎలా నిలిచిందనే దానిపై చర్చ మొదలైంది. నిపుణుల విశ్లేషణ ప్రకారం.. దీనికి అదృష్టంతో పాటు ఇంటి నిర్మాణ విధానం కూడా ప్రధాన కారణంగా కనిపిస్తోంది. హిమాలయ ప్రాంతాల్లోని కొన్ని ఇళ్లు రాళ్లతో నిర్మిస్తుంటారు. వాటికి బలమైన రీఇన్‌ఫోర్స్‌డ్‌ కాంక్రీట్‌ ఫ్రేమ్‌ లేకపోవడంతో భారీగా పక్కదిశ నుంచి ఒత్తిడి వస్తే కూలిపోయే ప్రమాదం ఉంటుంది.
ఇవి కూడా చదవండి
అయితే ఈ ఇంటిని రీఇన్‌ఫోర్స్‌డ్‌ కాంక్రీట్‌ ఫ్రేమ్‌తో నిర్మించారు. స్తంభాలు, బీములు, పునాదులను స్టీల్‌ రాడ్లతో అనుసంధానించడం వల్ల నిర్మాణానికి అదనపు బలం చేకూరింది. వరద నీరు, బురద ఢీకొన్న సమయంలో ఏర్పడిన పక్కదిశ ఒత్తిడిని ఈ నిర్మాణం తట్టుకోగలిగింది.
ఇంటిని నిర్మించిన ప్రదేశం కూడా కీలకంగా మారింది. అది ప్రధాన వరద ప్రవాహానికి నేరుగా మధ్యలో కాకుండా కొంత పక్కకు, కొద్దిగా ఎత్తైన ప్రాంతంలో ఉంది. దీంతో భారీ బండరాళ్లు, మట్టి నేరుగా ఇంటిని ఢీకొట్టలేదు. ఇంటి ఆకారం కారణంగా వరద నీరు రెండువైపులా పక్కగా ప్రవహించింది. అనంతరం పేరుకుపోయిన మట్టి కూడా ఒక రకమైన సహజ అడ్డంకిగా మారి మరింత వరద ఉద్ధృతి నేరుగా ఇంటిపై పడకుండా అడ్డుకుంది.
భారీ వరదలతో నేపాల్‌లో భారీ ప్రాణ, ఆస్తి నష్టం జరిగినట్లు సమాచారం. ఈ ఘటనలో ఇప్పటివరకు 700 మందికి పైగా మరణించగా.. 3,000 మందికి పైగా గల్లంతైనట్లు తెలుస్తోంది.
