పన్ను సంస్కరణలతో చిన్న కార్ల మార్కెట్‌కు భారీ ఊతం
గత ఏడాది కేంద్ర ప్రభుత్వం తీసుకొచ్చిన జీఎస్టీ 2.0 సంస్కరణలు లేకపోతే పశ్చిమాసియా ఉద్రిక్తతల నేపథ్యంలో దేశ ఆర్థిక పరిస్థితి మరింత క్లిష్టంగా ఉండేదని మారుతి సుజుకి ఇండియా చైర్మన్ ఆర్.సి. భార్గవ అన్నారు. సోమవారం జరిగిన కంపెనీ వార్షిక సర్వసభ్య సమావేశంలో ఆయన ఈ వ్యాఖ్యలు చేశారు.
జీఎస్టీ సంస్కరణలు భారత ఆర్థిక వ్యవస్థకు రక్షణ కవచంలా పనిచేశాయని భార్గవ పేర్కొన్నారు. ఈ మార్పుల ప్రభావం కేవలం ఆటోమొబైల్ రంగానికే పరిమితం కాలేదని, అనేక ఇతర రంగాలకు కూడా ప్రయోజనం చేకూరిందని తెలిపారు.
ఇవి కూడా చదవండి
ప్రత్యేకంగా చిన్న కార్ల మార్కెట్ గత ఐదేళ్ల వృద్ధితో పోలిస్తే జీఎస్టీ సంస్కరణల తర్వాత వేగంగా పుంజుకుందని చెప్పారు. పశ్చిమాసియా సంక్షోభం వంటి అంతర్జాతీయ సవాళ్లు ఉన్నప్పటికీ భారత ఆర్థిక వ్యవస్థ మెరుగైన పనితీరు కనబరుస్తోందని విశ్లేషించారు.
జీఎస్టీ మార్పుల ప్రయోజనాలు ఆటో రంగాన్ని దాటి విస్తృత ఆర్థిక వ్యవస్థకు చేరాయని, దీంతో జీడీపీ వృద్ధి అంచనాలను మించి నమోదవుతోందని భార్గవ అన్నారు.
ఈ కీలక సంస్కరణలు తీసుకొచ్చినందుకు ప్రధాని నరేంద్ర మోదీ, ఆర్థిక మంత్రి నిర్మలా సీతారామన్‌కు ఆయన కృతజ్ఞతలు తెలిపారు. ఉపాధి అవకాశాలు, పారిశ్రామిక పోటీతత్వం పెంచే సంస్కరణలకు రాజకీయ పార్టీలన్నీ మద్దతు ఇవ్వాలని కోరారు.
