గుడివాడ: స్థానిక సంస్థల ఎన్నికల నేపథ్యంలో గుడివాడ రాజకీయాలు ఆసక్తికరంగా మారుతున్నాయి. గత మున్సిపల్ ఎన్నికల్లో ఏకపక్షంగా ఆధిపత్యం ప్రదర్శించిన వైసీపీ.. ఈసారి అదే ఫలితాన్ని పునరావృతం చేయగలదా అన్న చర్చ పార్టీ వర్గాల్లో మొదలైంది. మరోవైపు అధికార కూటమి గుడివాడ మున్సిపాలిటీపై ప్రత్యేక దృష్టి పెట్టడంతో పోరు మరింత రసవత్తరంగా మారే అవకాశముంది.
గత మున్సిపల్ ఎన్నికల్లో గుడివాడలోని మొత్తం 31 వార్డులను వైసీపీ కైవసం చేసుకుంది. దీంతో ఈసారి కూడా పట్టణంపై పట్టు నిలుపుకోవడం ఆ పార్టీకి ప్రతిష్ఠాత్మకంగా మారింది. అయితే ప్రస్తుతం క్షేత్రస్థాయిలో పార్టీ ఎదుర్కొంటున్న పరిస్థితులు వైసీపీ నేతలకు సవాలుగా మారుతున్నాయన్న అభిప్రాయాలు వ్యక్తమవుతున్నాయి.
అందుబాటులో లేని నేత.. కేడర్‌లో కలవరం
గుడివాడ వైసీపీ ఇన్‌చార్జిగా ఉన్న మాజీ మంత్రి కొడాలి నాని ఎక్కువ సమయం హైదరాబాద్‌లోనే ఉంటుండటం పార్టీ కార్యకర్తల్లో చర్చకు కారణమవుతోంది. అప్పుడప్పుడు నియోజకవర్గానికి వచ్చినప్పటికీ.. ఎన్నికల సమయంలో మాత్రమే రంగంలోకి దిగితే పార్టీకి పూర్తి స్థాయిలో ప్రయోజనం ఉండదని కొందరు కార్యకర్తలు భావిస్తున్నట్లు సమాచారం.
ప్రభుత్వాన్ని ఎదుర్కొంటూ స్థానికంగా పార్టీని నడిపించేందుకు కొడాలి నాని ప్రత్యక్షంగా అందుబాటులో ఉండాలని కేడర్ కోరుకుంటున్నట్లు తెలుస్తోంది. ఆయన నియోజకవర్గంలో చురుకుగా ఉంటేనే అధికార కూటమికి గట్టి పోటీ ఇవ్వగలమన్న అభిప్రాయం పార్టీ శ్రేణుల్లో వ్యక్తమవుతోంది.
ఇవి కూడా చదవండి
రెండు దశాబ్దాల రాజకీయ అనుభవం
గుడివాడలో దాదాపు రెండు దశాబ్దాల పాటు కొడాలి నాని ఎన్నికల రాజకీయాల్లో కీలక పాత్ర పోషించారు. అయితే గత అసెంబ్లీ ఎన్నికల్లో తొలిసారి ఆయన ఓటమి చవిచూశారు. అయినప్పటికీ పట్టణంలో ఆయనకు ఉన్న వ్యక్తిగత పరిచయాలు, రాజకీయ అనుభవం వైసీపీకి ఇప్పటికీ బలంగా మారవచ్చని ఆ పార్టీ వర్గాలు భావిస్తున్నాయి.
టీడీపీ వ్యూహాలతో వైసీపీకి సవాల్
మరోవైపు మాజీ మున్సిపల్ చైర్మన్ యలవర్తి శ్రీనివాసరావు టీడీపీలో కొనసాగుతుండటం వైసీపీకి మరో సవాలుగా మారింది. గతంలో కొడాలి నానికి సన్నిహితంగా ఉంటూ గుడివాడ పట్టణ రాజకీయాల్లో కీలకంగా వ్యవహరించిన ఆయన.. ప్రస్తుతం టీడీపీ తరఫున పనిచేస్తుండటం రాజకీయంగా ప్రాధాన్యం సంతరించుకుంది.
ఇక స్థానిక ఎమ్మెల్యే వెనిగండ్ల రాము కూడా పార్టీ శ్రేణులతో సమన్వయం చేసుకుంటూ మున్సిపల్ ఎన్నికలపై దృష్టి పెట్టినట్లు తెలుస్తోంది. దీంతో గుడివాడలో అధికార కూటమి, వైసీపీ మధ్య పోటీ హోరాహోరీగా మారే అవకాశం ఉందని రాజకీయ పరిశీలకులు అంచనా వేస్తున్నారు.
మొత్తంగా గత ఎన్నికల్లో సాధించిన ఏకపక్ష విజయాన్ని నిలబెట్టుకోవడం వైసీపీకి అంత సులభం కాదన్న అభిప్రాయాలు వినిపిస్తున్నాయి. ఈ పరిస్థితుల్లో పార్టీ శ్రేణులను ఏకతాటిపైకి తీసుకురావడం, ఎన్నికల వ్యూహాన్ని సమర్థంగా అమలు చేయడంలో కొడాలి నాని ఎంతవరకు కీలకంగా వ్యవహరిస్తారనేదే గుడివాడ రాజకీయాల్లో ప్రధాన చర్చగా మారింది.
