మహిళల ఆసియా కప్ 2026లో భారత మహిళల జట్టు అదరగొట్టింది. దుబాయ్‌లో పాకిస్థాన్‌తో జరిగిన మ్యాచ్‌లో భారత్ 7 వికెట్ల తేడాతో ఘన విజయం సాధించింది. భారత బౌలర్లు విజృంభించడంతో పాక్‌ జట్టు 55 పరుగులకే కుప్పకూలింది.
టాస్‌ గెలిచిన పాకిస్థాన్‌ తొలుత బ్యాటింగ్‌ ఎంచుకున్నప్పటికీ.. భారత బౌలర్ల ముందు ఆ జట్టు బ్యాటర్లు నిలబడలేకపోయారు. శ్రీ చరణి, ప్రేమ రావత్‌ చెరో మూడు వికెట్లతో సత్తా చాటగా.. దీప్తి శర్మ రెండు వికెట్లు పడగొట్టింది. దీంతో పాక్‌ 18.1 ఓవర్లలోనే 55 పరుగులకు ఆలౌటైంది.
స్వల్ప లక్ష్యంతో బరిలోకి దిగిన భారత్‌కు ఆరంభంలో ఎదురుదెబ్బ తగిలింది. పాక్‌ కెప్టెన్‌ ఫాతిమా సనా వరుసగా మూడు వికెట్లు తీసి భారత్‌ను ఒత్తిడిలోకి నెట్టింది. అయితే కెప్టెన్‌ హర్మన్‌ప్రీత్‌ కౌర్‌, దీప్తి శర్మ జాగ్రత్తగా ఆడి ఇన్నింగ్స్‌ను చక్కదిద్దారు.
ఇవి కూడా చదవండి
చివరికి భారత్ 8.4 ఓవర్లలోనే 57 పరుగులు చేసి విజయాన్ని అందుకుంది. హర్మన్‌ప్రీత్‌ కౌర్‌ 18 పరుగులతో, దీప్తి శర్మ 12 పరుగులతో నాటౌట్‌గా నిలిచారు. అద్భుత బౌలింగ్‌తో పాక్‌ను తక్కువ స్కోరుకే పరిమితం చేసిన భారత జట్టు.. బ్యాటింగ్‌లోనూ లక్ష్యాన్ని వేగంగా ఛేదించి చిరకాల ప్రత్యర్థిపై ఘన విజయం సాధించింది.
