హైదరాబాద్, సెప్టెంబర్ 30: పార్టీ పేరును టీఆర్ఎస్ నుంచి బీఆర్ఎస్‌గా మార్చినంత మాత్రాన తమ సిద్ధాంతం, ఆలోచనా విధానం, నాయకత్వం మారదని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. ఇండియా టుడే కాన్‌క్లేవ్‌లో మాట్లాడిన ఆయన.. పార్టీ పేరు మార్పుపై ఆసక్తికర వ్యాఖ్యలు చేశారు.తన పేరు షారుఖ్ ఖాన్‌గా మార్చుకున్నంత మాత్రాన తాను షారుఖ్ ఖాన్ అయిపోనని కేటీఆర్ వ్యాఖ్యానించారు. అదే విధంగా టీఆర్ఎస్ పేరును బీఆర్ఎస్‌గా మార్చినప్పటికీ పార్టీ విధానాల్లో మార్పు రాలేదని స్పష్టం చేశారు. తెలుగు సినిమాలు పాన్‌ ఇండియా స్థాయిలో విజయాలు సాధిస్తున్నప్పుడు.. తెలుగు గడ్డపై పుట్టిన రాజకీయ పార్టీ జాతీయ స్థాయికి ఎందుకు విస్తరించకూడదని ఆయన ప్రశ్నించారు.తెలంగాణలో అమలు చేసిన అభివృద్ధి, సంక్షేమ కార్యక్రమాలను దేశంలోని ఇతర ప్రాంతాలకు కూడా తీసుకెళ్లాలనే ఉద్దేశంతోనే పార్టీ పేరును మార్చినట్లు కేటీఆర్ తెలిపారు. తెలంగాణ రాజకీయాలపై మాట్లాడుతూ మరోసారి కేసీఆర్ ముఖ్యమంత్రి అవుతారని ధీమా వ్యక్తం చేశారు. కాంగ్రెస్ ప్రభుత్వ పాలనపై ప్రజల్లో అసంతృప్తి పెరిగిందని ఆయన పేర్కొన్నారు.ఇదే సందర్భంగా బీజేపీ, కాంగ్రెస్ పార్టీలపై కేటీఆర్ విమర్శలు చేశారు. మతపరమైన అంశాలతో ప్రజల దృష్టిని మళ్లించే ప్రయత్నాలు జరుగుతున్నాయని ఆరోపించారు. ఉద్యోగాల కల్పన, ఎన్నికల హామీల అమలు వంటి ప్రజా సమస్యలకు ప్రాధాన్యం ఇవ్వాలని అన్నారు.ఎన్నికల సంఘం పనితీరుపైనా కేటీఆర్ ప్రశ్నలు లేవనెత్తారు. దేశవ్యాప్తంగా ఈసీ విశ్వసనీయతపై సందేహాలు వ్యక్తమవుతున్నాయని పేర్కొంటూ.. ఈ అంశంపై సుప్రీంకోర్టు సుమోటోగా విచారణ చేపట్టాలని డిమాండ్ చేశారు. కేంద్రంలోని బీజేపీ ప్రభుత్వంపై ప్రజల్లో వ్యతిరేకత ఉందని ఆయన అన్నారు. అదే సమయంలో కాంగ్రెస్ అగ్రనేత రాహుల్ గాంధీ యువతతో కలిసి ముందుకు సాగడంలో విఫలమయ్యారని కేటీఆర్ విమర్శించారు.పార్టీ జాతీయ విస్తరణ, తెలంగాణలో బీఆర్ఎస్ భవిష్యత్ రాజకీయ వ్యూహం, కాంగ్రెస్ ప్రభుత్వ పనితీరు వంటి అంశాలపై కేటీఆర్ చేసిన వ్యాఖ్యలు ప్రస్తుతం తెలంగాణ రాజకీయాల్లో చర్చనీయాంశంగా మారాయి.
