ఏషియన్ గేమ్స్‌ ఆర్చరీలో భారత మహిళల రికర్వ్‌ జట్టు చరిత్ర సృష్టించింది. అంకిత భకత్‌, కీర్తి శర్మ, కుంకుమ్‌ మొహోడ్‌లతో కూడిన భారత త్రయం ఫైనల్లో దక్షిణ కొరియాను 5-3తో ఓడించి స్వర్ణ పతకం సాధించింది.
మహిళల రికర్వ్‌ టీమ్‌ ఈవెంట్‌లో భారత్‌కు ఇదే తొలి స్వర్ణం. 44 ఏళ్లుగా ఈ విభాగంలో కొనసాగుతున్న కొరియా ఆధిపత్యానికి భారత జట్టు తెరదించింది. ప్రపంచ ఛాంపియన్‌గా ఉన్న కొరియాపై ఒత్తిడిని తట్టుకుని భారత ఆర్చర్లు అద్భుత ప్రదర్శన చేశారు.
అంతకుముందు సెమీఫైనల్లో భారత్‌ చైనాను 5-1తో ఓడించి ఫైనల్‌కు చేరింది. సెమీస్‌లో కీలక సమయాల్లో కీర్తి శర్మ వరుసగా 10 పాయింట్ల షాట్లు సాధించి జట్టు విజయానికి దోహదపడింది.
ఇవి కూడా చదవండి
ఫైనల్లో ఉత్కంఠ
కొరియాతో జరిగిన ఫైనల్లో తొలి రెండు సెట్లు 2-2తో సమంగా ముగిశాయి. మూడో సెట్‌లో కొరియా ఆర్చర్లు కొన్ని 8 పాయింట్ల షాట్లు వేయడంతో భారత్‌ 55 స్కోరుతో ఆధిక్యంలోకి వెళ్లింది.
నాలుగో సెట్‌లో ఇరు జట్లు 54 స్కోరు సాధించాయి. కీర్తి శర్మ వేసిన ఓ షాట్‌ను సమీక్షించిన అనంతరం 8 నుంచి 9 పాయింట్లుగా మార్చడంతో భారత్‌ స్కోరు సమమైంది. దీంతో భారత జట్టు స్వర్ణాన్ని ఖాయం చేసుకుంది.
